ဆရာတော်အရှင်ဘုရား၊ ဂေါတမမြတ်စွာဘုရားသည် ဘုရားအဖြစ်သို့ ရောက်ရှိတော်မူပြီးနောက် သတ္တ၀ါများအား တရားမဟောရန် စိတ်အကြံဖြစ်ကြာင်း ဖတ်ရဖူးပါသည်၊ အဘယ်ကြောင့် ဤသို့ စိတ်အကြံဖြစ်ရပါသနည်းဘုရား၊ အတိတ်မှ ပွင့်ပြီးသောဘုရားရှင်တို့နှင့် နောင်ပွင့်လတံ့ ဘုရားရှင်တို့လည်း ထိုကဲ့သို့ စိတ်အကြံ ဖြစ်-မဖြစ် သိလိုပါသဖြင့် ဖြေကြားတော်မူပါဘုရား။
( နေထွန်းခိုင်-ပြည် )

( ဖြေ ) မြတ်စွာဘုရားသည် ဘုရားအဖြစ်သို့ ရောက်တော်မူစ၌ တရားတော်ကို ဆင်ခြင်တော်မူရာ တရားတော်၏ အလွန်တရာ သိမ်မွေ့ နက်နဲ ခက်ခဲမှုကို မြင်တော်မူပြီး သတ္တ၀ါတို့ကို ဆင်ခြင်ကြည့်ရှုရာ၌ သတ္တ၀ါတို့၌ ကိလေသာမြူမြှေးများ လွန်စွာ ထူထဲနေသည်ကို မြင်တော်မူ၍ တရားတော်နှင့် သတ္တ၀ါတို့ အခြေအနေကို နှိုင်းယှဉ်လျက် ယခု ငါ-တရားဟောလျှင် ပင်ပန်းရုံသာဖြစ်မည်-ဟု ကြံတော်မူ၍ လောလောဆယ် တရားမဟောသေးရန် စိတ်ညွတ်တော်မူပါသည်။

ထို့ပြင် ထိုအချိန်၌ လူတို့သည် ဗြဟ္မာ၌ လေးစားမှုရှိ၍ သဟမ္ပတိ ဗြဟ္မာမင်း တရားတောင်းပန်အံ့သည်ကိုလည်း ငံ့လင့်တော်မူခဲ့သည်-ဟု ဆိုပါသည်၊ ဗြဟ္မာတောင်းပန်မှ တရားဟောတော်မူသည်မှာ ဘုရားရှင်တိုင်း၏ ဓမ္မတာဖြစ်ကြောင်း ဓမ္မတာ ၃၀-၌ ပါဝင်သဖြင့် ဗြဟ္မာတောင်းပန်သည်အထိ ငံ့လင့်ခြင်းလည်း ဖြစ်နိုင်ပါသည်။ ထိုသို့ ဘုရားတိုင်းပင် ဗြဟ္မာတောင်းပန်မှ တရားဟောတော်မူရသည့် ဓမ္မတာရှိ၍ အတိတ် အနာဂတ် မြတ်စွာဘုရားတို့သည်လည်း ဤကဲ့သို့ ရုတ်တရက်ချက်ချင်း အဆောတလျှင် တရားမဟောရန် စိတ်အကြံဖြစ်ရမြဲပင် ဖြစ်ကြောင်း သိနိုင်ပါသည်။