အမေး။အရှင်ဘုရား… တပည့်တော်သိချင်တဲ့အောက်ပါပြဿနာများကို ဖြေကြားပေးတော်မူပါဘုရား။
(၁)။ သီလရှင်ဘယ်အချိန်က စတင်ပေါ်ပေါက်လာပါသလဲဘုရား။
(၂)။ ဘိက္ခုနီမကို ကိုရင်က ရှိခိုးသင့်ပါသလားဘုရား။
(၃)။ သီလရှင်ကို လူယောင်္ကျားက ရှိခိုးသင့်ပါသလားဘုရား။
(၄)။ ခြင်ဆေးထွန်းလို့ ခြင်သေရင် ပါဏာတိပါတကံထိုက်ပါသလားဘုရား။
အေးသီတာဝင်း
MCC-မြိတ်

အဖြေ။ ။မအေးသီတာဝင်းမေးတဲ့မေးခွန်းလေးခုအနက် ပထမ အမေးပြဿနာကို အရင်ပြောမယ်
သီလရှင်အကြောင်းနဲ့ပတ်သက်ပြီး လုံးဝမလေ့လာဘူးတဲ့အတွက် အခက်တွေ့ရပါတယ်။ ဒါနဲ့သီလရှင်အကြောင်းရေးထားတဲ့ စာအုပ်လိုက်ရှာတော့ စာကြည့်တိုက်တစ်တိုက်မှ ဆရာရဝေထွန်းရေးတဲ့ ဘိက္ခုနီသာသနာနဲ့သီလရှင်သမိုင်း စာအုပ်ကို တွေ့ရှိခဲ့ပါတယ်။ ဒီစာအုပ်က အတော်လဲစုံစုံလင်လင်ပါပဲ။ လေ့လာရသမျှ တိုကျဉ်းလိုရင်း ဖြေကြားပေးလိုက်ပါတယ်။
သီလရှင်ဟာ ဘယ်အချိန်ကစတင်ပေါ်ပေါက်လာသလဲဆိုရင် ဘိက္ခုနီသာသနာကွယ်ပြီးနောက်ပိုင်းမှာ ပေါ်ပေါက်လာတယ်လို့ အကြမ်း ဖျဉ်းအနေနဲ့ ပြောလို့ရပါတယ်။ ဘိက္ခုနီသာသနာကွယ်တဲ့အချိန်ကို လေ့လာကြည့်တဲ့အခါ သာသနာနှစ် ကိုးရာကျော် AD သုံးရာစုဝန်း ကျင်လောက်မှာ ဘိက္ခုနီသာသနာနောက်ဆုံးတည်ရှိခဲ့တဲ့သီဟိုဠ်ကျွန်းအကြောင်းကို ရေးသားတဲ့ တရုတ်ရဟန်းတော် ဖာဟီယန်မှတ်တမ်းမှ တွေ့ရှိချက်အရ… သာသနာတော်နှစ် ကိုးရာကျော်၊ ADသုံးရာစု ၀န်းကျင်လောက်ကတည်းက ဘိက္ခုနီသာသနာမရှိတော့ဘူးဆိုတာကို သိရပါတယ်။
တစ်ခါ သာသနာတော်နှစ် ၉၀၀ မှ ၁၄၀၀နှစ်အတွင်း (AD သုံးရာစုမှ ADကိုးရာစု) ပျုခေတ်ကြီးမှာ ပျုအမျိုးသမီးများဟာ သီလရှင်ဝတ် ကြပါတယ်။ အဲဒီတုန်းက သီလရှင်ကိုတော့ ပရိဗိုဇ်မယ် လို့ခေါ်ကြပါတယ်။ဒီကနေ သီလရှင်သာသနာဟာ ပုဂံခေတ်၊အင်းဝခေတ် အထိ အဆက်ဆက် ထွန်းကားလာခဲ့တယ်။ ကုန်းဘောင်ခေတ်ရောက်တော့ မယ်ခေမာလို့ခေါ်တဲ့ သီလရှင်မယ်ကင်းတို့ခေတ်မှာ သီလရှင်သာသနာ ထင်ရှားလာခဲ့တာ ယခုအတိုင်ထိဆိုပါတော့။ ဒီအကြောင်းကို အကြမ်းဖျင်းသဘော နားလည်အောင် အကျဉ်းချုံးဖေါ်ပြလိုက်ပါတယ်။ အကျယ်သိချင်ရင်တော့ ဆရာရဝေထွန်းရေးသားတဲ့ “ဘိက္ခနီသာသနာနဲ့သီလရှင်သမိုင်း” စာအုပ်မှာ ဖတ်ရှုနိူင်ပါတယ်။
ဒုတိယပြဿနာ..
ဘိက္ခုနီမက ကိုရင်ကို ရှိခိုးသင့်-မသင့်ဆိုတာနဲ့စပ်လို့ ဘိက္ခုနီများအတွက် ဂရုဓမ်ရှစ်ပါးမှာဖေါ်ပြထားတာကတော့ အဘယ်ဘိက္ခုနီမ မဆို ရဟန်းသိက္ခာဝါ တစ်ရာ ရနေပါစေ၊ ယနေ့မှ ရဟန်းဖြစ်လာတဲ့ ဘိက္ခုရဟန်းယောင်္ကျားအား ရှိခိုးမှု၊ နေရာမှထ ခရီးဦးကြိုဆိုမှု၊ လက်အုပ်ချီမှု၊ အရိုအသေပြုမှုစတာတွေကို ပြုရပါမယ်၊ ဒါကို ဘိက္ခုနီမများက အသက်ထက်ဆုံးလိုက်နာကျင့်သုံးရမယ်၊ မကျုးလွန်ရ လို့ ဘုရားရှင် ပညတ်တော်မူချက်အရ.. ဘိက္ခုနီမက ယနေ့ဖြစ်စရဟန်းတော်ကို ရှိခိုးရမယ်ဆိုတာသာပါတယ်။ ကိုရင်ကိုရှိခိုးရမယ်ဆိုတာမပါပါဘူး။
တစ်ခါ ရဟန်းဝိနည်းမှာ ရဟန်းဟာ လူ၊သာမဏေများနဲ့အတူ နှစ်ညဉ့်၊သုံးညဉ့်ထက်ပိုလွန်ပြီးမအိပ်ရ၊ သုံးညဉ့်ထက်ပိုလွန်ပြီးအိပ်ရင် ပါစိတ်အာပတ်သင့်စေ လို့ ပဌမသဟသေယျသိက္ခပုဒ်ကို ပညတ်တော်မူခဲ့ပါတယ်။ ဒါကိုကြည့်ရင် ရဟန်းတော်များက တစ်ကဏ္ဍ၊ လူနဲ့သာမဏေက တစ်ကဏ္ဍ ခွဲခြားထားတာတွေ့ရတယ်။ လူနဲ့သာမဏေကို အတူတူအိပ်ရင်ရနိူင်တယ်ဆိုတဲ့သဘောပါပဲ။ ဘိက္ခုနီမဆိုတာကလဲ အမျိုးသမီးပင်ဖြစ်ပေမဲ့လို့ ရဟန်းစာရင်းဝင်ဖြစ်တယ်။ ဘိက္ခုနီပါတိမောက်လာတဲ့သိက္ခာပုဒ်အရေအတွက်မှာ (၃၀၁)ပါးရှိတယ်၊ ဒါ့အပြင် စူဠ၀ဂ္ဂခန္ဓကတို့မှာလဲ သိက္ခာပုဒ်ငယ်များ များစွာရှိပါသေးတယ်။
သာမဏေနဲ့ဘိက္ခုနီမတို့ကို နှိုင်းယှဉ်ကြည့်ရင် သာမဏေရဲ့သိက္ခပုဒ်မှာ တစ်ရာကျော်လောက်သာရှိတယ်။ ဘိက္ခုနီမများဖြစ်ဖို့အတွက် သိမ်ထဲမှာဘိက္ခုသံဃာတို့က ဥတ္တိစတုက္ကကမ္မ၀ါစာကို ရွတ်ဖတ်ကံဆောင်ပြီးမှ ရဟန်းမ ဖြစ်လာကြတာပါ။ ဒါ့အပြင် သီလသိက္ခာ ၀ါစဉ်အလိုက်လဲရှိပါတယ်။ သာမဏေမှာတော့ ၀ါစဉ်ဆိုတာမရှိပါဘူး။ ဒါကြောင့် ဘိက္ခုနီမများက ကိုရင်တွေကို ရှိခိုးစရာ မလိုပါဘူး။ ဒါဖြင့် ကိုရင်က ဘိက္ခုနီကို ရှိခိုးရမှာလား ။ ဒါနဲ့ပတ်သက်ပြီး ဘိက္ခုပါတိမောက၊သုရာပါန၀ဂ်မှာ သာသနာတွင်း သီတင်းသုံးဖေါ်ငါးဦးကို (၁)ရဟန်း၊(၂)ရဟန်းမိန်းမ၊(၃)သိက္ခာမာန်၊(၄)သာမဏေ၊(၅)သာမဏေရီမ လို့ အစဉ်အတိုင်းဖေါ်ပြထားတာတွေ့ရပါတယ်။ ရဟန်းမိန်းမနောက်က သိက္ခာမာန်၊သိက္ခာမာန်နောက်ကမှ သာမဏေကိုဖေါ်ပြထားတာပါ။ ဒီအစဉ်ကိုကြည့်ခြင်းဖြင့် ကိုရင်ကသာ ရဟန်းမိန်းမကို ရှိခိုးသင့်တယ်လို့ ယူဆရပါတယ်။ တကယ်လို့ ရဟန်းမိန်းမက ကိုရင်ကိုရှိခိုးသင့်တယ်ဆိုရင် ဘိက္ခု ပြီးရင် သာမဏေပဲလာရမှာဖြစ်တယ်။ ဒုတိယပြဿနာရှင်း လောက်ပါပြီ။
တတိယပြဿနာ…
သီလရှင်နဲ့အမိအဘ၊ လူယောင်္ကျားနဲ့သီလရှင်တို့ကျတော့ သီလသိက္ခာပုဒ်အနည်းအများအပေါ်မူတည်ပြီး၊ သီလနည်းသူက သီလများသူကို ရှိခိုးနိူင်ပါတယ်။ ဒါနဲ့စပ်ပြီး..
တစ်ခါက ဝေသာလီမှာ အလိုရှိသလောက်နေတော်မူပြီး သာဝတ္ထိ ဇေတ၀န်ကျောင်းတော်ကို ကြွတော်မူပါတယ်။ ထိုအခါမှာ ဆဗ္ဗဂ္ဂီရဟန်းတို့ရဲ့ တပည့်များက ဇေတ၀န်ကျောင်းတော်ကို ဦးစွာရောက်လာကြပြီး ၊ ဒါက ငါတို့ဥပဇ္ဈာယ်ဆရာအတွက်၊ဒါက ကမ္မ၀ါစာဆရာ အတွက်၊ဒါက ငါတို့အတွက်ဆိုပြီး ဦးစွာ အိပ်ရာနေရာများကို ယူထားလိုက်ကြပါတယ်။ နောက်မှရောက်လာတဲ့မထေရ်များအတွက် အိပ်ရာနေရာ မရဖြစ်ကုန်ကြတယ်။ ရှင်သာရိပုတ္တရာရဲ့တပည့်များက ရှင်သာရိပုတ္တရာအတွက် အိပ်ရာနေရာ ရှာကြသော်လဲ နေရာမရဖြစ်ကုန်ကြတယ်။ ဒီလိုနဲ့ ရှင်သာရိပုတ္တရာရောက်လာတော့ အိပ်ရာနေရာမရရှိတဲ့အတွက် မြတ်စွာဘုရားကျောင်းအနီး သစ်ပင်ရင်းမှာ ထိုင်ရင်း၊စင်္ကြန်သွားရင် ညဥ့်အချိန်ကို ကုန်လွန်စေခဲ့ပါတယ်။
မနက်မိုးသောက်ရောက်တော့ ဘုရားရှင်က ထွက်ပြီး ချောင်းဟန့်ပါတယ်။ရှင်သာရိပုတ္တရာကလဲ ချောင်းဟန့်ပါတယ်။ ဘုရားရှင်က “ဘယ်သူလဲ” လို့မေးတော်မူတဲ့အခါ ရှင်သာရိပုတ္တရာက “တပည့်တော် သာရိပုတ္တရာပါဘုရား” လို့လျှောက်တယ်။ ထိုအခါဘုရားရှင်က “ဘာ့ကြောင့် ဒီလိုဖြစ်ရတာလဲ” လို့မေးတော်မူတော့ ရှင်သာရိပုတ္တရာက ဖြစ်ကြောင်းကုန်စဉ် လျှောက်ထားလိုက်ပါတယ်။ မထေရ်စကားကိုကြား ရတဲ့အခါ “ငါဘုရားရှိစဉ်မှာတောင်မှ ရဟန်းတစ်ပါးနဲ့တစ်ပါး ရိုသေတုံ့ဝပ်ခြင်း မရှိကြဘူးဆိုရင်၊ ငါဘုရား ပရိနိဗ္ဗာန်ပြုပြီးတဲ့အနောက်ပိုင်း ဘယ်လိုများ လုပ်ကြမှာလဲ” လို့ ဆင်ခြင်ကာ ဓမ္မသံဝေဂဖြစ်တော်မူပါတယ်။
ဒီလိုနဲ့ မနက်လင်းတဲ့အခါ ရဟန်းသံဃာတော်များကို စည်းဝေးစေပြီး “ရဟန်းတို့… ဘယ်ရဟန်းက နေရာဦး၊ဆွမ်းဦး ထိုက်ပါသလဲ၊ ဘယ်ရဟန်းကို အရိုသေပေးသင့်ပါသလဲ” လို့ ဘုရားရှင်က မေးတော်မူပါတယ်။ ထိုအခါရဟန်းတော်များက “အရှင်ဘုရား မင်းမျိုးကလာတဲ့ရဟန်းကို အရိုသေပေးထိုက်ပါတယ်”၊ “ပုဏ္ဏားမျိုးကလာတဲ့ရဟန်းကို အရိုအသေပေးထိုက်တယ်” “သူဌေးကနေ ရဟန်းဖြစ်လာတဲ့ရဟန်းကို အရိုအသေပေးထိုက်တယ်”၊ တစ်ချို့က ပဌမဈာန်ရတဲ့ရဟန်း၊ တစ်ချို့က ဒုတိယဈာန်၊တတိယဈာန်၊စတုတ္ထဈာန် ရတဲ့ ရဟန်းကို အရိုအသေပေးထိုက်တယ်၊ အချို့ကလဲ သောတာပန်၊သကဒါဂါမ်၊အနာဂါမ်၊ရဟန္တာများ၊ အဘိညဉ်ရတဲ့ရဟန်းတော်များကို အရိုအသေပေးထိုက်တယ် ဆိုပြီး ဘုရားအား လျှောက်ထားကြပါတယ်။
ထိုအခါ ဘုရားရှင်က “ ရဟန်းတို့…အခုသင်တို့ပြောတဲ့မင်းမျိုး၊သူဌေးမျိုးစတဲ့ရဟန်းများဟာ အဓိကမဟုတ်ဘူး။ အမှန်တော့ ငါဘုရားသာသနာတော်တွင်းမှာ အစဉ်အတိုင်း ကြီးသူကို ရှိခိုးခြင်း၊ ခရီးဦးကြိုဆိုခြင်း၊ လက်အုပ်ချီခြင်း၊ အရိုအသေပြုခြင်းစတာ တွေကို ပြုလုပ်ရမယ်” လို့ မိန့်တော်မူပြီး ရဟန်းများကို ဆုံးမလိုတဲ့အတွက် “တိတ္တိရဇာတ်တော်”ကို ဟောကြားတော်မူခဲ့ပါတယ်။ ထိုတိတ္တိရဇာတ်တော်မှာ “အစဉ်အတိုင်းကြီးသူကို” (ယေ၀ုဍ္ဎမပစာယန္တိ)ဆိုတဲ့စကားတော်မှာ ဂုဏ်အားဖြင့်ပြည့်စုံခြင်း(ဂုဏသမ္ပန္န) အရွယ်အားဖြင့်ကြီးခြင်း(၀ယောဝုဍ္ဎ)ကို ယူရမယ်လို့ အဋ္ဌကထာဆရာကမိန့်တော်မူတဲ့အတွက် အခုပြဿနာမှာ(ဂုဏသမ္ပန္န)သီလဂုဏ်ပြည့်စုံခြင်းကို ယူရပါ့မယ်။ဒါကြောင့် သီလဂုဏ်ပြည့်စုံတဲ့ပုဂ္ဂိုလ်ကို သီလသိက္ခာပုဒ်နည်းတဲ့သူက ရှိခိုးရမယ်လို့ မှတ်ယူရပါမယ်။ ဒါနဲ့ပတ်သက်ပြီး ပြည့်ပြည့်စုံစုံ သိချင်တယ်ဆိုရင်တော့ ကုလာဝက၀ဂ္ဂ၊ တိတ္တိရဇာတက၀ဏ္ဏနာ ၊ ဇာတကအဋ္ဌကထာ မှာ ဖတ်ရှုနိုင်ပါတယ်။
ဒါကြောင့် မိဘများက ငါးပါးသီလသာရှိပြီး၊ သီလရှင်က ရှစ်ပါး၊ဆယ်ပါးသီလရှိတယ်ဆိုရင်တော့ မိဘက သီလရှင်ကို ရှိခိုးသင့်တယ်။ တကယ်လို့ မိဘက ဆယ်ပါးသီလယူထားမယ်ဆိုရင်တော့ မိဘကို သီလရှင်က ရှိခိုးသင့် တယ်လို့ ယူဆရပါမယ်။
လူပုဂ္ဂိုလ်နဲ့သီလရှင်တို့လဲ ထို့အတူပဲ မှတ်ယူရပါမယ်။
စတုတ္ထပြဿနာ…
ခြင်ဆေးထွန်းလို့ ခြင်သေရင် ပါဏာတိပါတထိုက်မထိုက်ဆိုတာနဲ့ပတ်သက်ပြီး ပြောရရင် ပါဏာတိပါတကံထိုက်တဲ့ အင်္ဂါလေးပါးရှိပါ တယ်။ (၁)သတ္တ၀ါရယ်လို့အမှတ်သညာရှိခြင်း။ (၂) သတ်လိုတဲ့စိတ်၊သေစေလိုတဲ့စိတ်ရှိခြင်း။ (၃) လုံ့လစိုက်ခြင်း။ (၄)သေခြင်း တို့ဖြစ်ကြပါတယ်။
ခြင်ဆေးထွန်းတာနဲ့စပ်လို့ပြောရရင် (၁)ခြင်ဆိုတဲ့အမှတ်သညာရှိခြင်း။ (၂) ခြင်ကိုသေစေလိုတဲ့စိတ်ရှိခြင်း။(၃) ခြင်ဆေးထွန်းခြင်းဆိုတဲ့လုံ့လစိုက် ခြင်း။ (၄) ခြင်သေခြင်းတို့ဖြစ်တယ်။ ဒီအချက်လေးချက်ထဲမှာ ဒုတိယအချက်ပဲပြောစရာရှိတယ်။ ဒုတိယအင်္ဂါအရ သေစေလိုတဲ့စိတ်ရှိ-မရှိဆိုတာနဲ့စပ်ပြီးပြောရရင် ခြင်သေမယ်ဆိုတာသိရက်နဲ့ ခြင်ဆေးထွန်းလို့ရှိရင်တော့ သေစေချင်တဲ့စိတ်ပါပြီးသားဖြစ်နေတယ်ဆိုတာကို သတိပြုရပါမယ်။ ဒါကြောင့် အထက်ပါအင်္ဂါ လေးချက်နဲ့ကိုက်ညီရင်တော့ ပါဏာတိပါတကံထိုက်တယ်လို့ပြောရပါလိမ့်မယ်။ ။

စာရေးသူ- ဦးကောဝိဒ(မြိတ်)