“မြေကြီးလိုကျင့်”
•••••••••••••••••••••
ဘုန်းဘုန်းဘုရား ...
ရိုသေစွာ လျှောက်ထားခွင့်ပြုပါ အရှင်ဘုရား။
လောကမှာ လူတယောက်ကို ဥက္ခောပြုထားလိုက်တယ်
ဆိုလို့ ရှိလို့ ရှိရင် အဲဒီလူနဲ့ ပတ်သက်ပြီး
ဖြစ်ချင်ရာဖြစ်ပါစေ ဘာမှ မပြောတော့ဘူးဆိုတဲ့
အဓိပ္ပါယ် ဖြစ်ပါတယ်။ မနှစ်သက်တော့တဲ့အတွက်
ပစ်ထား လိုက်တဲ့ သဘောဖြစ်ပါတယ်။
ဒါပေမယ့် ဥပေက္ခာဆိုတာ လုပ်ရခက်တဲ့ ပါရမီလို့လည်း
ဆိုပြန်တယ်။ အဲဒါကို တပည့်တော် နားမလည်တော့ပါ။
“ဥပေက္ခာ ပြုထားတယ်” ဆိုတာနဲ့ “ဥပေက္ခာ ပါရမီ”
ဆိုတာ ဘယ်လို ကွာခြားပါသလဲ ..
ဖြေကြားပေးစေချင်ပါသည်။
-【ခင်ခင်ကြီး ... သာကေတ】

“ဥပေက္ခာ ပြုထား”
•••••••••••••••••••••••
အမြင်ကပ်လို့ ၊မုန်းလို့ ၊မနှစ်သက်လို့ ဥက္ခောပြုထားလိုက်တယ်
ဆိုရာမှာ အဓိပ္ပာယ်က အဆိုးနဲ့ တုံ့ပြန်လာတဲ့
လောကအပေါ် အမုန်းခံစားချက်နဲ့ လက်လျှော့ အရှုံးပေးပြီး၊
ဘာမှ မတုန့်ပြန်ဘဲ ပစ်ထားလိုက်တယ်လို့
နားလည်ရတယ်။ ဒါကြောင့် “ဥပေက္ခာပြု”ဆိုရာမှာ
❦ဒေါသ (စိတ်ဆိုး အမျက်ထွက်မှု) မြှုပ်နေတယ်၊ ရှိနေတယ်။
❦တစ်ချိန်တည်းမှာ အကောင်း နဲ့ တုံ့ပြန်လာမယ့်
လောကကိုတော့ အမြင်မကပ်ဘူး၊ ချစ်တယ်၊ ကြိုက်တယ်။
ဒါကြောင့် ဥပေက္ခာပြု မထားဘူး၊ ဂရုစိုက်မယ်၊
လက်ခံ သိမ်းပိုက်ထားမယ်ဆိုတဲ့ အနုနယ
(တပ်မက်၊ စွဲလမ်းမှု) သဘောကိုလည်း
အဲဒီ စကားလုံးထည်းမှာပဲ အလိုလို တွေ့ရပြန်တယ်။
အဲဒီလို “ပဋိဃ နဲ့ အနုနယ” ရှိနေရင်
“ဥပေက္ခာပါရမီ” မဟုတ်ဘူး။
ဒါကြောင့် ဥပေက္ခာ ပြုထားလိုက်တယ်လို့ ပြောဆိုတဲ့အခါ
“ဖြစ်ချင်ရာဖြစ်၊ ပစ်ထားလိုက်တယ်”လို့ သာမန်ပဲ
နားလည်ရင် မရှုပ်တော့ဘူး။

“ဥပေက္ခာပါရမီ”
••••••••••••••••••••••
ဥပေက္ခာဆိုတဲ့ ပါဠိဝေါဟာရမှာ “ဥပ နဲ့ ဣက္ခ”လို့ ပုဒ်နှစ်ခု
ပါတယ်။ ဥပ(သမံ ကတွာ) = အညီအမျှပြု၍၊
မခွဲခြားဘဲ။ ဣက္ခ = ရှုတယ်၊
မြင်တယ်၊ ခံယူတယ်။ အဓိပ္ပာယ်က လောဘနဲ့
တွယ်ကပ်ထားခြင်း၊ ဒေါသနဲ့ ငြင်းပယ်ပစ်ခြင်း မရှိဘဲ၊
တစ်နည်း နှစ်သက်ခြင်း မနှစ်သက်ခြင်း မရှိဘဲ
ခံယူတယ်လို့ ဖြစ်ပါတယ်။

ပါရမီဆယ်ပါးမှာ အခက်ခဲဆုံး နဲ့ အောင်မြင်ပြီး
အထွတ်အထိပ် ပန်းတိုင်ကို ရောက်လိုသူတွေအဖို့
အလိုအပ်ဆုံး ကျင့်စဉ် ဖြစ်ပါတယ်။
ဘာတွေကို တွယ်ကပ်ပြီး၊ ဘာတွေကို
ငြင်းပယ်သလဲ ဆိုရင် လောက လူသားတွေ ကြုံတွေ့ရမြဲ
ဖြစ်တဲ့ အကောင်း၊အဆိုး “ဘဝလောကဓံ” တွေကိုပါပဲ။

လူ့ဘဝဆိုတာ သူသူငါငါ ပန်းခင်းလမ်း နဲ့ ခရောင်းလမ်း
နှစ်မျိုးပေါ်မှာ တစ်လှည့်တစ်ပြန်စီ ပင်ပန်းကြီးစွာ
လျှောက်နေကြရတာပါ။
အကောင်းကို တွေ့ရင် သာယာမက်မောပြီး၊
တွယ်ကပ်ထားချင်တယ်။ အဆိုးကို တွေ့ရင် စိတ်ဆိုး၊
ဒေါသဖြစ်ပြီး ငြင်းပယ်လိုတယ်။

ဥပေက္ခာ ကျင့်စဉ်အရ အဲဒီသဘော နှစ်မျိုးရဲ့နောက်ကို
မလိုက်ဘဲနဲ့ အဲဒီနှစ်မျိုးနဲ့ ပတ်သက်ပြီး တူညီတဲ့
ခံစားမှုနဲ့ အလယ်က သွားရတယ်။
ဘယ်လောက်ပဲ အကောင်းနဲ့ တွေ့စေ မြောက်မသွားဘဲ၊
ဘယ်လောက်ပဲ အဆိုးနဲ့ တွေ့စေ စိတ်မပျက် ၊
လက်လျှော့ မသွားဘဲ သွားမြဲလမ်းကို မှန်မှန်ဖြောင့်ဖြောင့်
တည်တည်တံ့တံ့ ခိုင်ခိုင်ခံ့ခံ့ သွားနိုင်တဲ့ ခံနိုင်ရည်
ရှိရင် ပါရမီဖြစ်တာပါပဲ။

“မြေကြီးတူစွာ”
••••••••••••••
မြေကြီးဟာ ကျလာတဲ့ ကောင်း ၊မကောင်း နှစ်မျိုးကို
အညီအမျှပြုပြီး ခံယူတယ်။
အနုမြူဗုံး ဖောက်တော့လည်း မြေကြီးပေါ်မှာ။
ရနံ့လှိုင်တဲ့ပန်းတွေ ကြွေကျတော့လည်း မြေကြီးပေါ်မှာ။
ပန်းနံ့သာပဲ ကျလာလာ၊ မစင် အညစ်အကြေးပဲ
ကျလာလာ နှစ်မျိုးလုံးကို ဒီကမ္ဘာမြေက အညီ
အမျှ ခံယူတယ်။
အဲဒီလိုပဲ ဘဝပတ်ဝန်းကျင်က ပေးအပ်တဲ့ အကောင်း
နဲ့ အဆိုး သဘာဝနှစ်မျိုးနဲ့ ကြုံတွေ့ ခံစားရတဲ့အခါ
အဆိုးအပေါ်မှာ ပဋိဃ = စိတ်ဆိုးခြင်း၊
အကောင်းကိုလည်း အနုနယ = တွယ်တာ
တပ်မက်ခြင်း မရှိဘဲ မြေကြီးလို မခွဲမခြား အညီအမျှထားတဲ့
ကျင့်စဉ် ဟာ “ဥပေက္ခာ” ပါပဲ။

ကဲ့ရဲ့ ပြစ်ဆိုသံ ကြားရင် ငြင်းပယ်ခြင်း၊
တုံ့ပြန် တွန်းကန်ခြင်း မရှိဘူး။
ချီးမွမ်းသံ ဂုဏ်ပြုသံတွေ ကြားရင်လည်း သာ
ယာ ကြည်နူးပြီး တက်ကြွ မြောက်ကြွားခြင်း မရှိဘူး။
ကောင်းချင်တိုင်း ကောင်းနေပါစေ အနုနယ မဖြစ်၊
ဆိုးချင်တိုင်း ဆိုးနေပါစေ ပဋိဃမဖြစ်ဘဲ
ပုံမှန်ညီမျှပဲ ခံယူတယ်။

သိပ်ပြီး အောင်ပြင်ကျော်ကြား ကြီးပွားတိုးတက်လို့
ချီးမွမ်းမြှောက်ပင့် ခံရတဲ့အခါ မြောက်ကြွ၊မြောက်ကြွ
မဖြစ်ဘူး။ မြှောက်ပင့်တဲ့ဖက်ကို မကပ်ငြိဘူး။
သိပ်ပြီး ကဲ့ရဲ့ခံရတဲ့အခါလည်း စိတ်ဆိုး ဒေါသမဖြစ်ဘူး။
အလယ်ကပဲ သွားတယ်။
ကောင်းလည်း ပျက်တာပဲ၊ ဆိုးလည်းပျက်တာပဲလို့
ဆင်ခြင်ပြီး အကောင်း၊အဆိုးကို အညီအမျှပြုရင်း
အစွန်း နှစ်ပါးကို ရှောင်တယ်။

မြင့်မြတ်တဲ့ပုဂ္ဂိုလ်တွေ အထက်တန်းကို ရောက်
သွားသူတွေဟာ အဲဒီ ပဋိဃ အနုနယဆိုတဲ့
အစွန်းနှစ်ဖက်ကို ရှောင်ပြီး၊ ပန်းတိုင်ကို အရောက်
တက်လှမ်းသွားကြတာ။

“ဥပေက္ခာ ဩဝါဒ”
••••••••••••••••••••••••
ဘိက္ခုတို့၊ (မကြည်ညိုသူတွေက) ဗုဒ္ဓ ဓမ္မ သံဃာ၏
အပြစ်ကို ပြောကြလျှင် ရန်ငြိုးဖွဲ့ခြင်း၊ နှလုံးမသာယာခြင်း၊
စိတ်မကျေချမ်းခြင်း မဖြစ်ကြလင့်။ အမျက်ထွက် နှလုံးမသာ
ဖြစ်ကြမည်ဆိုလျှင် သင်တို့မှာသာလျှင် (ဈာန်မဂ်ဖိုလ်၏)
အန္တရာယ် ဖြစ်ရာ၏။ သူတစ်ပါးတို့၏ စကားကောင်း၊
စကားဆိုးကို(လည်း) သိနိုင်ကြမည် မဟုတ်။
(စိတ်ထဲက အပြစ်မယူဘဲ) မဟုတ်သည်ကို
မဟုတ်သည့်အတိုင်း ဖြေရှင်းရမည်။

ဘိက္ခုတို့၊ (ကြည်ညိုသူတွေက) ဗုဒ္ဓ ဓမ္မ သံဃာ၏
ဂုဏ်ကို ချီးမွမ်းပြောဆိုကြလျှင် သင်တို့သည် နှစ်သက်
ဝမ်းသာခြင်းဖြင့် မြောက်ကြွား၊တက်ကြွ မဖြစ်ကြလင့်။
ထောင်လွှား မြောက်ကြွ ဖြစ်မည်ဆိုလျှင် သင်တို့မှာသာလျှင်
(ဈာန်မဂ်ဖိုလ်၏) အန္တရာယ် ဖြစ်ရာ၏။
(စိတ်ထဲက မသာယာဘဲ)
ဟုတ်သည်ကို ဟုတ်သည့်အတိုင်းဝန်ခံရမည်။

“ချမ်းသာဆင်းရဲ၊ သဘောကွဲလည်း၊ လက်စွဲချိန်ခွင်၊
လေးတူတင်သို့၊ ပုံပြင်နှုန်းယူ၊ မြေအတူလျှင်၊
လျစ်လျူဆောင်ဆောင်၊ အကျဉ်းထောင်လျက်၊
အမောင်စိတ်ဇော၊ ကြည်စေလေဿး။”
(ပါရမီ၊ ပိုဒ် ၁၄၂)။
-【စာရိုက်ပူဇော်သူ - Admin Team of
Young Buddhist's Association】
-【ဆရာတော်အရှင်ကေလာသ】
Posted by►
www.facebook.com/youngbuddhistassociation.mm