တစ်ချို့တစ်ချို့သောပုဂ္ဂိုလ်တွေက ဝိနည်းဆိုတာကို
သူတို့ဘက်ပါ မပါနဲ့ ဆုံးဖြတ်ပြီး ၊
ပုဂ္ဂိုလ်ခင်ပြီး တရားမင်နေတာတွေ တွေ့ရတယ်။

အဲဒီတော့ လူ့အဖွဲ့အစည်း အသီးသီးမှာတောင်
အဆိုးအကောင်းတွေရှိနေကြသေးတာ ၊
ဆွမ်းဆန်ထဲ ကြွက်ချေးဆိုတာတော့ ရှိတတ်တာပဲလေ။

ဝိနည်း သိက္ခာပုဒ်တွေ ဘာကြောင့် ဘုရားရှင်ပညတ်တာတုန်းဆိုရင် ကျူးလွန်တဲ့သူရှိလို့သာ ပညတ်ရတာပါ၊
သာသနာအထွန်းကားဆုံးအချိန်ဖြစ်တဲ့ ဘုရားရှင်လက်ထက်မှာတောင် ကျူးလွန်နေကြသေးတာ..

အခုလို သာသနာနှောင်းပိုင်းကာလမှာလည်းပဲ ကျူးလွန်ကြမှာမလွဲပါဘူး။
ဆွမ်းဆန်ထဲမှာ ကြွက်ချေးပါတာနဲ့ ဆန်အိုးကြီးတစ်ခုလုံး သွန်ပစ်ဖို့မှမဟုတ်တာ ပါလာတဲ့ကြွက်ချေးကို ဖယ်စားလိုက်ပေါ့။

ဝိနည်းမှာက ဂရုကအာပတ် (ကုစားလို့ မရတဲ့ အာပတ် )နဲ့
လဟုကအာပတ် (ပြန်လည်ကုစားလို့ရတဲ့ အာပတ် )ဆိုပြီး
နှစ်မျိုးရှိပါတယ်။

အဲဒီထဲမှာ အကြီးလေးဆုံး အာပတ်ဆိုတာကတော့
ပါရာဇိက (၄)ပါး ဖြစ်ပါတယ်။

ပါရာဇိကလေးပါးဆိုတာက

၁။ မေထုန်မှီဝဲခြင်း
၂။ သူတစ်ပါးပစ္စည်းခိုးယူခြင်း
၃။ လူသတ်ခြင်း
၎။ ဈာန်.မဂ်ဖိုလ် မရဘဲနဲ့ ရတယ်လို့ပြောခြင်း

ဒီလေးပါးဟာ သာသနာမှာ အကြီးမားဆုံးသော ဂရုကအာပတ်များဖြစ်ကြပါတယ်။

ဤလေးပါး တစ်ပါးပါး ကျူးလွန်မိတဲ့သူဟာ ရဟန်းမဟုတ်တော့တဲ့သူပါ။( ကုစားလို့ မရတော့သော အာပတ် )

အဲဒီနောက် သံဃာဒိသေသ်( ၁၃ )ပါးဆိုတာ ရှိပါတယ်

ဒုတိယ အပြစ်အကြီးဆုံး သိက္ခာပုဒ်လို့ဆိုနိုင်ပါတယ်၊

သူကတော့ သိမ်ထဲမှာ သံဃာပါး ( ၂၀ )ခန့်နဲ့ ကုစားမယ်ဆိုရင်တော့ အာပတ်မှ စင်ကြယ်ပါတယ်။

ကုစားလို့ ရနိုင်ပါတယ်၊
ကျန်တဲ့ သိက္ခာပုဒ်တွေဆိုတာကတော့ ဒေသနာကြားရင်
အပြစ်ကြေပါတယ်။

ဥပမာ. ညစာစားမိတာတို့ ၊ အရက်သေစာသောက်မိတာတို့ ၊
ရုပ်ရှင် ဗွီဒီယိုဇာတ်ပွဲ အငြိမ့်ပွဲ ကြည့်မိတာတို့ ၊စတဲ့ သိက္ခာပုဒ်တွေကတော့ လဟုက အာပတ်လို့ ခေါ်ပါတယ်။

သေးမွှားတဲ့အာပတ် ဒေသနာကြားရင် အပြစ်ကြေတယ်ဆိုတဲ့
အာပတ်မျိုးပေါ့။

ဒီတော့ သေးမွှားတဲ့ အာပတ်လေးကို ကျူးလွန်မိတာနဲ့
ရဟန်းမဟုတ်တော့ဘူး ၊ ဝိနည်းနဲ့ မညီတော့ဘူးဆိုပြီး
မိမိက အပြစ်တင်ကဲ့ရဲ့နေတဲ့အချိန် ၊ဟိုရဟန်းက
အာပတ်စင်ကြယ်အောင် ဒေသနာကြားခြင်းကိစ္စဆောင်ရွက်ပြီးလို့
အာပတ်စင်ကြယ်နေတဲ့အချိန်မှာသွားပြီး
စော်ကားမိမယ်ဆိုရင်တော့ ...တစ်ကယ်မလွဲ အပါယ်ငရဲပါပဲ။

ဒီတော့ကား ရဟန်းတစ်ပါး သူ့ဖာသာ ဝိနည်းနဲ့
ညီသည် ဖြစ်စေ ၊ မညီသည် ဖြစ်စေ
သူ့လုပ်တဲ့ အပြစ် သူပဲခံရမှာပါ ၊ မိမိမျှခံစရာ မလိုပါဘူး။

မိမိက မကြည်ညိုရင် မကိုးကွယ်နဲ့ မလှူနဲ့ပေါ့ ။

မလှူလို့ မတန်းလို့ မကိုးကွယ်လို့ အပြစ်မဖြစ်ပါဘူး
ဒါပေမယ့်... စော်ကားပြစ်မှားမိရင်တော့ အပြစ်ဖြစ်ပါတယ်။

အဲဒီတော့ သူက သူကိုယ်တိုင် အပြစ်လုပ်လို့ ငရဲသွားရတာ ၊
မိမိက ကိုယ်တိုင်မလုပ်ဘဲ ပါးစပ်လေးနဲ့ စော်ကားပြီး
ငရဲကို အဖော်လိုက်ပေးရတာ တန်ပါ့မလား ။

ဒါကြောင့် မကြည်ညိုလို့ ၊ မကိုးကွယ်လို့ ဘာမှမဖြစ်ပါဘူး ၊
စော်ကားမိရင်တော့ အကုသိုလ်ဖြစ်ပါတယ်ဆိုတာကို
နားလည်သဘောပေါက်ပြီးသကာလ ၊
ကိုယ်နဲ့ ဆန္ဒတူသည် ဖြစ်စေ ၊ မတူသည် ဖြစ်စေ
ကိုယ့်ဘက်ပါသည်ဖြစ်စေ ၊ မပါသည်ဖြစ်စေ
မပြစ်မှားမိအောင် မစော်ကားမိအောင် နေနိုင်ကြပါစေလို့ တိုက်တွန်းလိုက်ပါတယ်။