••••••••••••••••••••••••••••••••
မေတ္တာက အင်မတန်အရေးကြီးပါတယ်။
လုပ်သမျှ ကုသိုလ်တွေကို အရည်အသွေး မြင့်မားသွားအောင် မေတ္တာက အမွှမ်းတင် ပေးနိုင်ပါတယ်။
မေတ္တာနှင့်ဒါန
•••••••••••••••
ဒါနကောင်းမှုပြုရင် စိတ်ထဲကနေ
မေတ္တာဓာတ်တွေ ထပ်တလဲလဲ
ပို့လွှတ်ပြီးတော့ ပြုမယ်။
တစ်နည်းပြောရရင် မေတ္တာဘာ၀နာ
ပွားပြီးတော့ ဒါနပြုမယ်ဆိုရင်
အဲဒီဒါနက ပိုပြီးတော့ အရည်အသွေး
မြင့်မားတဲ့ ဒါန ဖြစ်သွားတယ်။
ပိုပြီးတော့လည်း
အကျိုးပေးကြီးမားတယ်။
ဥပမာ ကိုရင်တစ်ပါးကို
ဆွမ်းလောင်းတယ်။
ဒီအတိုင်းပဲ လောင်းလိုက်တဲ့လူနဲ့
ဒီကိုရင်လေး ဒီဆွမ်းဘုဉ်းပေးပြီးတော့ ကျန်းမာချမ်းသာပါစေလို့ မေတ္တာပို့ပြီး လောင်းတဲ့လူနဲ့
ကုသိုလ်အရည်အသွေးချင်း
လုံး၀ကို မတူတော့ဘူး။
မေတ္တာနှင့်သီလ
•••••••••••••••••
သီလလည်း ဒီအတိုင်းပဲ။
သူများအသက် မသတ်ဘူးဆိုတာ
"သြော် ကိုယ်လည်း အသက်
သူလည်းအသက်"
ကိုယ့်သတ်ရင်လည်း မကြိုက်
သူ့သတ်ရင်လည်း ကြိုက်မှာမဟုတ်ဘူး။
ဒီအကောင်လေး ငါသတ်လိုက်ရင်
သေသွားမှာ အသက်မသေပါစေနဲ့။
ချမ်းသာပါစေဆိုပြီး …
ဒီသတ္တဝါလေးကို ချမ်းသာစေချင်တဲ့ မေတ္တာစိတ်လေးကြောင့် မသတ်တာ ဆိုရင်
သီလပျက်မှာစိုးလို့ ဒါမှမဟုတ် ဖြစ်လေရာ ဘ၀မှာ ကိုယ့်အသက်တိုမှာစိုးလို့ မသတ်တာနဲ့ အရည်အသွေးချင်းက လုံး၀ကွာခြားသွားပြီ။
အဲဒီတော့ သီလကုသိုလ်ရဲ့အရည်အသွေး
မြင့်မားအောင်လည်း မေတ္တာကပဲ လုပ်ပေး နိုင်တယ်။
မေတ္တာနှင့်ဝိပဿ နာ
••••••••••••••••••••
၀ိပဿ နာအလုပ်ကို အရည်အသွေး မြင့်မားအောင်လည်း မေတ္တာက လုပ်ပေးနိုင်တယ်။
၀ိပဿ နာဆိုတာ ရုပ်နာမ်ဖြစ်ပျက်ကို
ရှုမှတ် ပွားများရတာ…
ဖြစ်ပြီး ပျက်သွားတဲ့ သဘောတရားကို ရှုမှတ်နေရတာဆိုတော့…
ရှုမှတ်တဲ့ အချိန်ကြာလာလို့ရှိရင် ခြောက်ကပ် ပြီးတော့ ငြီးငွေ့သွားတာမျိုး ဖြစ်တတ်တယ်။
အရပ်ပြော ပြောရင် ပျင်းသွားတာပေါ့။
အဲဒီအချိန်မှာ မေတ္တာ ဘာ၀နာလေး ပွားလိုက်လို့ရှိရင် စိတ်က စိုစိုပြည်ပြည် လန်းလန်းဆန်းဆန်း ဖြစ်သွားတတ်တယ်။
ရုပ်နာမ်ဖြစ်ပျက်ကို အာရုံပြုနေရာကနေ သတ္တဝါတွေကို အာရုံပြုလိုက်တယ်။
သူတို့ကို ကောင်းကျိုးရစေချင်တဲ့ မေတ္တာ ဓာတ်လေးနဲ့ အာရုံပြုလိုက်တာ ဖြစ်တဲ့အတွက် စိတ်က စိုပြည်လန်းဆန်းသွားတယ်။
လန်းဆန်းသွားတဲ့စိတ်နဲ့ ဝိပဿနာ ဆက်ရှုလိုက်ရင် ဝိပဿနာ ဥာဏ် မြန်မြန်တက်သွားတတ်တယ်။
ရုပ်နာမ် ဖြစ်ပျက်ချည်းပဲ အဆက်မပြတ် တရစပ်ရှုနေတဲ့သူထက် …
မေတ္တာဘာ၀နာလေး ကြိုးကြားကြိုးကြား ပွားများတဲ့သူက တရားထူး တရားမြတ်
ပိုပြီးတော့ မြန်မြန်ရနိုင်တယ်။
လွယ်ကူသောအကျင့်
လျှင်မြန်သော အသိဥာဏ် ဆိုတာမှာ …
၀ိပဿ နာ အားထုတ်ခြင်းကြောင့်
လျှင်မြန်သော အသိဥာဏ်ရတယ်။
လွယ်ကူသော အကျင့်ဆိုတာ
ကတော့ သမထပါ။
မေတ္တာဘာ၀နာ အားနည်းခဲ့တဲ့သူက ဝိပဿနာအားထုတ်တဲ့ အချိန်မှာ
ပင်ပင်ပန်းပန်း အားထုတ်ရတတ်တယ်။
မေတ္တာဘာ၀နာအစရှိတဲ့ သမထကမ္မဋ္ဌာန်းကို အမြဲတမ်းတွဲပြီးအားထုတ်တဲ့သူ ဒါမှမဟုတ် သံသရာမှာလည်း အားထုတ်ခဲ့တဲ့သူက
၀ိပဿနာ ရှုမှတ်တဲ့အချိန်မှာ သက်သောင့် သက်သာ အားထုတ်ရပြီး ဝိပဿနာဥာဏ်
လည်း မြန်မြန်ရပါတယ်။
ဒါကြောင့် မေတ္တာ ဘာ၀နာပွားများခြင်းက ဝိပဿ နာ အလုပ်ကိုလည်း အများကြီး ကျေးဇူးပြုပါတယ်။
ဆရာတော်
အရှင်ဆန္ဒာဓိက(ရွှေပါရမီတောရ)