ဆရာတော် အရှင်မြတ်ဘုရား၊ အချို့ ဗုဒ္ဓရုပ်ပွားတော်များကို ရုပ်ရှင်တော်မြတ်-ဟူသော ဝေါဟာရဖြင့် ဖော်ပြထားသည်ကို တွေ့ရပါသည်၊ ရုပ်ရှင်တော်-၏ အဓိပ္ပါယ်ကို သိလိုပါသည်ဘုရား။
( သန်းလွင်-ပြွန်တန်ဆာမြို့ )


( ဖြေ )
အလွန်သပ္ပါယ်တော်မူသော ရုပ်ပွားတော်များသည် မျက်နှာတော်က လှုပ်ရှားနေသယောင်၊ ဖူးမြော်သူတို့ အမြင်တွင် အမျိုးမျိုး ထင်မြင်ကြရပါသည်။
ဥပမာ-ခြောက်ထပ်ကြီး လျောင်းတော်မူကြီးသည် မျက်လုံးတော် ကြည်လင်လှသဖြင့် မျက်တောင်ပင် ခတ်နေသကဲ့သို့ ထင်ရသည်။

ရခိုင်ပြည် ကျောက်တော်မြို့ မဟာမုနိရုပ်ပွားတော်မှာ မျက်နှာတော်ပုံ အမျိုးမျိုး ပြောင်းနေသကဲ့သို့ ထင်ရသည်။
မဟာဿွံသာရ ရုပ်ပွားတော်သည်လည်း တခါဖူး တမျိုး၊ တပုံတော် ဖြစ်နေတတ်သည်-ဟု ဆိုပါသည်။
ကျိုက်ထိုမြို့ ကျိုက်ပေါလော ရုပ်ပွားတော်၏ ညာဘက်နားထင်တော်ရှိ မှည့်ရှင်တော်မှာ နေရာရွှေ့ပြောင်းနေတတ်သည်-ဟု ကြားသိရပါသည်။

ထိုကဲ့သို့ ထူးထူးခြားခြား သပ္ပါယ်တော်မူသော ရုပ်ပွားတော်များကို ရုပ်ရှင်တော်-ဟု ဝေါဟာရ ပြုကြပါသည်၊ ထိုကဲ့သို့ ရုပ်ရှင်တော်ဟု အမည်တော်ရသော ရုပ်ပွားဆင်းတု ဥဒ္ဒိဿစေတီတော်များ မြန်မာနိုင်ငံတွင် တော်တော်များများ ရှိနေကြကြောင်း သိရပါသည်။