ဆရာတော်အရှင်ဘုရား၊ ယခုအခါ အသုဘအိမ်အချို့တွင် သေဆုံးသွားသူအတွက်ရော မိမိတို့ အိမ်သားတွေ အတွက်ပါ အကျိုးဖြစ်စေခြင်းငှါ ညဥ့်အချိန်များတွင် ဓမ္မစကြာ၊ အနတ္တလက္ခဏသုတ်၊ ပဋ္ဌာန်းဒေသနာ၊ ပရိတ်တရားတော်များကို ၀တ်အသင်းအဖွဲ့များ ပင့်ဖိတ်ရွတ်ဖတ်ကြသည်၊ ဤကဲ့သို့ မင်္ဂလာရှိသော မြင့်မြတ်သည့် ဒေသနာတော်များကို ဘုရားရှင် နှုတ်ကပါဌ်တော်များဖြစ်၍ ရွတ်ဆိုခြင်း သင့်-မသင့် ဖြေကြားပေးစေလိုပါသည်။
( ဒေါ်ယဉ်မေ-(ဆရာမ) ကညွတ်ကွင်း )

( ဖြေ )
ဗုဒ္ဓဘာသာ မြန်မာလူမျိုးတို့က အသုဘကို အမင်္ဂလာဟုဆိုကာ ကောင်းသောမင်္ဂလာကိစ္စများ မပြုကြပါ၊
အမှန်မှာ အသုဘများတွင် ကောင်းမွန်မြင့်မြတ်သော ဒါနမှု သီလမှု ဘာဝနာမှုများကို အလေးပေးပြုလုပ်သင့်ပါသည်၊

ပြဿနာရှင်၏စာတွင် ပါသကဲ့သို့ သေဆုံးသွားသူအတွက်ရော မိမိတို့ အိမ်သားတွေအတွက်ပါ လှူဒါန်းခြင်း၊ အမျှအတမ်းဝေခြင်း၊ ကိစ္စများသာမက ဓမ္မစကြာစသော တရားတော်များ ရွတ်ဆိုခြင်းများကို ပြုသင့်ပါသည်၊ မြတ်စွာဘုရားကိုယ်တော်တိုင်ပင် သီရိမာ၏ အသုဘအိမ်သို့ကြွသွား၍ တရားဟောသဖြင့် လူနတ်များစွာ အကျွတ်တရား ရကြပါသည်၊ အချို့အရပ်တို့တွင် အသုဘချရာ၌ ၀တ်အသင်းများကိုဖိတ်၍ ဓမ္မစကြာ၊ အနတ္တလက္ခဏသုတ်များကို ရွတ်ဆိုစေကြသည်ကို တွေ့ရပါသည်၊ ကောင်းသောအပြုအမူပင် ဖြစ်ပါသည်။

ပြဿနာရှင်ဖော်ပြသကဲ့သို့ အသုဘအိမ်တွင် ညစဉ်ရွတ်ဆိုစေလျှင် ဗုဒ္ဓဘာသာသမ္မာနွယ်ဝင် သူတော်စင်များပီပီ အလွန်ကောင်းမွန်သော အလေ့အထတခု ပေါ်ပေါက်လာနိုင်၍ အသုဘအိမ်တွင် အလွန်ဆိုးဝါးသည့် ဖဲဝိုင်းထောင်သောအလေ့ကို တွန်းလှန်ပယ်ရှား၍ ပစ်နိုင်ဖွယ်ရာပင် ဖြစ်ပေလိမ့်မည်။